ایک اور تاریخی عمارت منہدم، چیف سیکریٹری نے تحقیقات کا حکم دیدیا

کراچی (رپورٹر)کلفٹن کراچی میں واقع ایک اور تاریخی عمارت کو منہدم کردیا گیا ہے۔ چیف سیکریٹری سندھ آصف حیدر شاہ نے مذکورہ عمارت کے انہدام کا نوٹس لیتے ہوئے کمشنر کراچی کو اس معاملے کی انکوائری کرکے 72 گھنٹوں کے اندر رتفصیلی رپورٹ جمع کرانے کا حکم دیا ہے اور کہا ہے کہ اگر تحقیقات کے دوران کوئی بے ضابطگیاں سامنے آئیں تو ذمہ دار افراد اور متعلقہ افسران کے خلاف سخت کارروائی عمل میں لائی جائے۔
چیف سیکریٹری سندھ کے ترجمان کے مطابق خارس ہائوس نامی تاریخی ورثےکی حامل یہ عمارت کلفٹن روڈ، فریئر ٹاؤن کوارٹرز، باتھ آئی لینڈ روڈ، پلاٹ نمبر FT-4/14 پر واقع ہے.ترجمان کے مطابق سیکریٹری ثقافت، سیاحت، نوادرات و آرکائیوز، خیر محمد کلوڑ، اور ڈائریکٹر جنرل سندھ بلڈنگ کنٹرول اتھارٹی (ایس بی سی اے) اسحاق کھوڑو کو ہدایت دی گئی ہے کہ وہ تحقیقات کے دوران کمشنر کراچی کو مکمل معاونت فراہم کریں۔
ترجمان کے مطابق چیف سیکریٹری نے سیکریٹری ثقافت کو ہدایت دی کہ کراچی بھر میں ورثے کی حامل عمارات کا میپنگ کا عمل فوری طور پر شروع کیا جائے اور مستقبل میں اس قسم کی خلاف ورزیوں یا غیرقانونی انہدام کی روک تھام کے لیے نگرانی کے نظام کو مؤثر بنایا جائے.