گریٹر کراچی پلان: ڈی ایچ اے سمیت تمام اسٹیک ہولڈرز سے مشاورت کی ہدایت

کراچی (ہینڈ آئوٹ) وزیر بلدیات سندھ سید ناصر حسین شاہ کی زیر صدارت چیف سیکریٹری آصف حیدر شاہ کے ہمراہ گریٹر کراچی ریجنل پلان 2047 کی دوسری پروجیکٹ اسٹیرنگ کمیٹی کا اجلاس سندھ سیکرٹیریٹ میں منعقد ہوا۔اجلاس میں وزیر بلدیات سندھ کو گریٹر کراچی پلان 2047 کے منصوبے کی موجودہ پیش رفت اور پہلی پروجیکٹ اسٹیرنگ کمیٹی کے فیصلوں پر عملدرآمد کے بارے میں تفصیلی بریفنگ دی گئی۔وزیر بلدیات سندھ سید ناصر حسین شاہ نے اجلاس سے خطاب کرتے ہوئے کہا کہ تمام اتھارٹیز کے تعاون سے گریٹر کراچی ریجنل پلان 2047 کراچی کا شہری، ماحولیاتی اور اقتصادی ڈھانچے میں انقلابی تبدیلی لانے کا حامل منصوبہ ہوگا،تمام اسٹیک ہولڈرز اور زمین کی ملکیت رکھنے والی ایجنسیوں، یوٹیلٹی ایجنسیوں کے ساتھ مشاورت سے منصوبہ بندی کو حتمی شکل دی جائے۔ مختصر، درمیانی اور طویل مدتی منصوبہ بندی کی جانی چاہیے جو قابل عمل ہو۔
چیف سیکریٹری سندھ آصف حیدر شاہ نے اجلاس میں خصوصی طور پر شرکت کرتے ہوئے کہا کہ کراچی میں متعدد ایجنسیاں کام کر رہی ہیں، اور ہم تنہا کام نہیں کر سکتے۔ حتمی رپورٹ درست طریقے سے تیار کی جائے، کے ڈی اے، ایم ڈی اے، ایل ڈی اے، کنٹومنٹ بورڈز، ڈی ایچ اے کا ان پٹ ضروری ہے۔انہوں نے کہا کہ ٹریفک کی بھیڑ سے نمٹنے کے لیے خاص طور پر فوری ایکشن پلان کی ضرورت ہے، جون 2027 میں حتمی رپورٹ آنے کا انتظار نہیں کر سکتا۔اسی طرح کراچی واٹر کارپوریشن اضافی پانی کی فراہمی کے لئے لائن بچھا رہا ہے، یہ منصوبہ بندی کا حصہ ہونا چاہیے۔تمام ایجنسیاں جو ترقیاتی کام کر رہی ہیں جب بھی سڑک بنتی ہے، تو یوٹیلیٹی ادارے بلا کسی منصوبہ اور مشاروت کے سڑک کی کھدائی کا کام شروع کردیتے ہیں۔
اس موقع پر بین الاقوامی کنسلٹنٹ کی جانب سے وزیر بلدیات کو بریفنگ دی گئی، جس میں شہری منصوبہ بندی، انفراسٹرکچر ڈویلپمنٹ، ٹرانسپورٹ، ماحولیات، واٹر مینجمنٹ اور ہاؤسنگ کے منصوبوں کی موجودہ صورتحال اور آئندہ لائحہ عمل پر روشنی ڈالی گئی۔اس موقع پر ایڈیشنل چیف سیکریٹری لوکل گورنمنٹ ڈاکٹر وسیم شمشاد نے کہا کہ گریٹر کراچی ایک اہم پلان ہے، اس پلان کو کامیاب بنانے میں وفاقی اداروں کے ساتھ کورڈی نیشن ایک جامع منصوبہ بندی اور مثالی شہر کا قیام عمل میں آسکے گا۔مزید انہوں نے کہا کہ یہ پلان شہر کے طویل المدتی ترقیاتی مقاصد کو مدنظر رکھتے ہوئے تیار کیا جا رہا ہے تاکہ کراچی کو ایک جدید، پائیدار اور رہنے کے قابل میگا سٹی بنایا جا سکے۔وزیر بلدیات نے متعلقہ محکموں کو ہدایت دی کہ منصوبے پر کام کو ترجیحی بنیادوں پر مکمل کیا جائے۔وزیر بلدیات نے کہا کہ صوبائی حکومت کراچی کے شہریوں کو بہتر بلدیاتی سہولیات، جدید شہری منصوبہ بندی، صاف ماحول اور معیاری طرزِ زندگی فراہم کرنے کے لیے ہر ممکن اقدامات کر رہی ہے۔ گریٹر کراچی پلان 2047 انہی کاوشوں کا حصہ ہے۔
اجلاس میں سیکرٹری پلاننگ اینڈ ڈیویلپمنٹ ڈیپارٹمنٹ ،ڈی جی کے ڈی اے، ڈی جی ایل ڈی اے، ڈی جی ایس بی سی اے، ڈی جی مسٹر پلان، کے پی ٹی، ڈی ایچ اے، پاکستان ریلوے، این ای ڈی یونیورسٹی، داؤد یونیورسٹی، محمد علی جناح یونیورسٹی ، حبیب یونیورسٹی ، آئی بی اے کے نمائندوں سمیت دیگر متعلقہ محکموں کے افسران نے شرکت کی۔