کراچی (پریس رلیز) سندھ کے سینئر وزیر شرجیل انعام میمن کی جانب سے پاکستان پیپلز پارٹی کے سینٹرل ایگزیکٹو کمیٹی کے ممبران کے اعزاز میں ظہرانہ دیا گیا۔ ظہرانے کی تقریب میں پنجاب کے گورنر سردار سلیم حیدر خان، خیبر پختونخوا کے گورنر فیصل کریم کنڈی، وزیر اعلٰی بلوچستان سرفراز بگٹی اور پاکستان پیپلز پارٹی کی سینٹرل ایگزیکٹو کمیٹی کے ممبران نیئر حسین بخاری، ندیم افضل چن، قمر الزمان کائرہ، چوہدری منظور، ہمایوں خان، رکن قومی اسیمبلی اعجاز جکھرانی، صوبائی وزیر برائے بلدیات سید ناصر حسین شاہ، صوبائی وزیر برائے محنت و سماجی تحفظ سعید غنی، سہیل انور سیال، ساجد اسحاق دشتی، آغا شکیل درانی اور دیگر شریک ہوئے.
ظہرانے کے موقع پر پارٹی کے تنظیمی امور، ملکی سیاسی صورتحال، اور آئندہ کی حکمتِ عملی پر تفصیلی تبادلۂ خیال کیا گیا۔ ملاقات میں شرکاء نے ملک کی موجودہ سیاسی فضا، وفاقی روابط اور عوامی فلاحی منصوبوں کے تسلسل پر بات چیت کی۔ شرجیل انعام میمن نے مرکزی رہنماؤں کو سندھ میں جاری ترقیاتی منصوبوں سے آگاہ کیا، جن میں پیپلز بس سروس، ای وی بس سروس، سندھ پیپلز ہاؤسنگ فاؤنڈیشن، اور تھر کے توانائی و ترقیاتی منصوبے شامل ہیں۔
پیپلز پارٹی رہنماؤں نے اتفاق کیا کہ موجودہ سیاسی چیلنجز کے باوجود پیپلز پارٹی وفاق کی علامت کے طور پر اپنا فعال اور تعمیری کردار ادا کرتی رہے گی، اور ملک کی وحدت و جمہوریت کے استحکام کے لیے اپنی کاوشیں جاری رکھے گی۔
‘پیپلز پارٹی وفاقی علامت کا کردار ادا کرتی رہے گی’
