مہران ٹائون حادثہ بلدیاتی اداروں کی سنگین غفلت ہے، سردار رحیم

کراچی (پریس رلیز) کورنگی مہران ٹاؤن میں کھلے مین ہول میں گر کر معصوم بچے کے جاں بحق ہونے کے دلخراش واقعے پر پاکستان مسلم لیگ فنکشنل سندھ کے سیکریٹری جنرل سردار عبدالرحیم نے شدید مذمت کرتے ہوئے اسے سندھ حکومت اور بلدیاتی اداروں کی بدترین غفلت اور مجرمانہ لاپروائی قرار دیا ہے۔
اپنے مذمتی بیان میں سردار عبدالرحیم نے کہا کہ کورنگی میں مین ہول کا ڈھکن نہ ہونے کے باعث ایک معصوم بچے کی جان جانا اس بات کا واضح ثبوت ہے کہ سندھ میں انسانی جان کی کوئی اہمیت باقی نہیں رہی۔ انہوں نے کہا کہ ہزاروں ارب روپے کے سالانہ بجٹ کے باوجود شہری آج بھی گٹر کے ایک ڈھکن کو ترس رہے ہیں، جو حکمرانوں کی نااہلی اور بدانتظامی کا منہ بولتا ثبوت ہے۔
سردار عبدالرحیم نے کہا کہ جو حکومت دس گٹروں کے ڈھکن تک فراہم نہیں کر سکتی، وہ عوام کی جان و مال کی محافظ ہونے کا دعویٰ کرنے کی اہل نہیں۔ انہوں نے سوال اٹھایا کہ معصوم بچے کا خون آخر کس کے ہاتھوں پر ہے؟ اور اس واقعے کے ذمہ داروں کو قوم کے سامنے جواب دینا ہوگا۔