کراچی (رپورٹر) جوڈیشل مجسٹریٹ جنوبی نے پیکا ایکٹ میں گرفتار صحافی اسلم شاہ کی درخواست ضمانت منظور کرلی ہے. عدالت نے انہیں30 ہزار روپے کے مچلکے جمع کرانے کی ہدایت کی ہے، اس موقع پر اسلم شاہ کے وکیل نعیم قریشی نے کہا کہ کس کو نہیں معلوم کے واٹر ہائیڈرنٹس کے ذریعے پانی فروخت کیا جارہا ہے ، اس جرم کو رپورٹ کرنے پر صحافی کو گرفتار کرکے جیل بھیج دیا گیا ہے ، اسلم شاہ کا 32 سالہ صحافتی کیرئیر ہے، پورا پریس کلب اس کے پیچھے کھڑا ہے ، ایسی قانون سازی کی گئی ہے جس کے تحت صحافیوں کو سچ لکھنے پر جیل میں ڈالا دیا گیا ہے .اس موقع پر عدالت نے اپنے رمارکس میںکہا کہ جرنلسٹ پروٹیکشن ایکٹ کی موجودگی میں کسی صحافی کو کیسے گرفتار کیا جاسکتا ہے .
این سی سی آئی اے کے وکیل شیراز راجپر نے کہا کہ کسی بھی اسکینڈل کے خلاف ٹی وی اور اخبارات میں لکھنا جرم نہیں ہے ،سوشل میڈیا پر الزامات رپورٹ کرنے پر اعتراض ہے .عدالت نے پوچھا کہ سوشل میڈیا پر رپورٹ کرنے سے کیا کسی کی ڈیفیمیشن ہوجاتی ہے ؟ وکیل نے کہا کہ جرنلزم ٹی وی اور اخبار کے لیے ہوتی ہے سوشل میڈیا پر پوسٹ کرنا خلاف قانون ہے .
واضحرہے کہ اسلم شاہ کے خلاف واٹر بورڈ کے افسر کی شکایت پر پیکا ایکٹ کے تحت مقدمہ درج کرکے اسے گرفتار کیا گیا تھا.
صحافی اسلم شاہ کی ضمانت منظور
