کراچی (ہینڈ آئوٹ) آئی جی سندھ غلام نبی میمن نے ٹریفک پولیس کو ہدایت کی ہے کہ صوبے میں بغیر نمبر پلیٹ چلنے والی گاڑیوں کے خلاف سخت کاروائی کی جائے۔انہوں نے یہ احکامات جمعہ کو “فیس لیس ای ٹکٹنک سسٹم” کی کارکردگی سے متعلق منعقدہ پہلے اجلاس کی صدارت کرتے ہوئے دیے. سینٹرل پولیس آفس کراچی میں منعقدہ اجلاس میں ایڈیشنل آئی جیز،ویلفیئر، ٹریننگ،ڈی جی سیف سٹی،ڈی آئی جیز کرائم اینڈ انویسٹی گیشنز، اسٹبلشمنٹ، ہیڈکواٹرز،ٹریفک کراچی،آئی ٹی،ایڈمن کراچی،ڈرائیونگ لائسنس، فائنانس اور دیگر اے آئی جیز نے شرکت کی۔
ترجمان آئی جی پولیس سندھ سید سعد علی کے مطابق اجلاس کے شرکاء کو ڈی آئی جی ٹریفک کراچی نے شہر میں فیس لیس ای ٹکٹنگ سہولت اور اسکے مختلف امور و اقدامات پر تفصیلی بریفنگ دی.بریفنگ میںبتایا گیا کہ 27 اکتوبر سے کراچی میں فیس لیس ای ٹکٹنگ سہولت کا باقاعدہ نفاذ کیا جاچکا ہے،ٹریفک کے نئے قانون کے باقاعدہ نفاذ کو مختلف عوامی حلقوں میں پذیرائی و حوصلہ افزائی کا سلسلہ جاری ہے۔ عوام کی جانب سے اس نظام کی حوصلہ افزائی کیساتھ ساتھ سوالات،مثبت تجاویز و سفارشات بھی موصول ہورہی ہیں، روڈ سیفٹی انفرا اسٹکچر کو یقینی بنانے کے لئے کراچی ٹریفک منجمنٹ بورڈ کا قیام ناگزیر ہے.
اجلاس میں سندھ کے دیگر اضلاع میں بھی فیس لیس ای چالان کی سہولت کو متعارف کروانے کے لئے مخلتف آپشنز پر غورکیا گیا۔ اجلاس میںتجویز دی گئی کہ دیگر اضلاع میں سیف سٹی کے نفاذ تک مصروف شاہراہوں و مقامات پر نصب سرکاری کیمروں اور خصوصی انتظامات کے ذریعے فیس لیس ای ٹکٹنک سہولت متعارف کروائی جاسکتی ہے۔
ا س موقع پر آئی جی سندھ غلام نبی میمن نے ڈی آئی جی ٹریفک کراچی سید پیر محمد شاہ کی تعریف کرتے ہوئے کہا کہ انہوں نے فیس لیس ای ٹکٹنگ سہولت کے سلسلے میں جو محنت کی ہے وہ قابل تعریف و ستائش ہے، ہمارا اصل مقصد ٹریفک حادثات کی روک تھام اور ٹریفک نظم وضبط یقینی بنانا ہے، حادثات کی بنیادی وجہ تیز رفتاری ہے، اس خلاف ورزی پر سخت کاروائی کی جائے۔آئی جی سندھ نے کہا کہ صوبے کے دیگر اضلاع کی مصروف شاہراہوں پر سی سی ٹی وی کیمراز کی تنصیب سے متعلق تجاویز دی جائیں، ٹریفک سہولت مراکز کا قیام صوبے کے ہر ضلع میں یقینی بنایا جائے، ٹریفک پولیس کی ہیلپ لائن 1915کو سندھ کے دیگراضلاع تک وسعت دی جائے، گاڑیوں کی مقررہ حد رفتار سے متعلق عوامی سطح پر آگاہی کو یقینی بنایاجائے۔
ڈی آئی جی ٹریفک کراچی نے کہا کہ فیس لیس ٹکٹنگ کے نفاذ کے بعد کراچی میں دستی چالان کا سلسلہ مکمل طور پر ختم ہوگی، مختلف پلیٹ فارمز پر شہریوں کی جانب سے فیس لیس ای ٹکٹنگ سہولت کا بھرپور خیرمقدم کیا گیا ہے، منفی پروپیگنڈہ اور تاثر کو فیس لیس ای ٹکٹنگ سہولت کو کامیاب بناکر جواب دیں گے۔
بغیر نمبر پلیٹ گاڑیوںکے خلاف سخت کارروائی کی جائے، آئی جی سندھ
